Главная --> Святые Угодники Божьи --> Акафист святому князю Даниилу, Московскому

Акафист святому благоверному великому князю Даниилу, Московскому чудотворцу

Молитва | Акафист | Канон | Житие | Иконы

Акафист святому благоверному великому князю Даниилу, Московскому чудотворцу

Кондак 1
Избранный чудотворче и предивный угодниче Христов, града Москвы и державы Российския крепкое ограждение, раздоров и нестроений искоренителю, благоверный княже Данииле, похвальная восписуем ти, к раце мощей твоих притекающе. Ты же, яко имеяй дерзновение ко Господу, от всяких нас бед свободи, зовущих: Радуйся, преподобне княже Данииле, Московский чудотворче.
Икос 1
Ангелов Творец и Господь дни великих бед и напастей, обышедших страну нашу от нечестиваго царства агарянскаго, восхотев людем страждущим утешение даровати, яви тя, княже Данииле, яко плод красен от чресл великаго князя Александра; людие же, о рождении твоем радости исполнившеся, взывах ти сицевая: Радуйся, корене благочестиваго прозябение; радуйся, добродетелей отца твоего и матере наследниче. Радуйся, рождением твоим люди града Владимира возвеселивый; радуйся, грядущую славу Москвы предвозвестивый. Радуйся, избранниче Божий; радуйся, правило веры благочестивыя. Радуйся, образе кротости духовныя; радуйся. Бога, яко истиннаго Отца нашего, издетска познавый. Радуйся, яко Иосиф, от братии твоея досаждения сладце претерпевый; радуйся, последи и братию свою в любовь себе призвавый. Радуйся, преподобне княже Данииле, Московский чудотворче.
Кондак 2
Видяще ближнии твои, блаженне, день от дне во благочестии тя возрастающа, и не точию млеком матерним, но паче благодатию Божиею питаема, радовахуся и, Господа о сем хваляще, взываху: Аллилуиа.
Икос 2
Разум богопросвещен имея уразумел еси, всехвальне, по словеси апостольскому, яко нужнейши всего есть благочестие, имже и потщался еси обогатити душу твою, в молитвах и научении словеси Божию всеусердно пребывая. Того ради людие ублажаху тя сице: Радуйся, молитвенниче теплейший; радуйся, послушниче Евангелия усерднейший. Радуйся, добродетели высокия в сердце твоем вкоренивый; радуйся, в заповедех Господних вся дни живота твоего ходивый. Радуйся, образом жития твоего мир посреди братии водворивый; радуйся Господа твоего паче всех возлюбивый. Радуйся, положити душу свою за други своя непрестанное желание имевый; радуйся, благодать Господню в сердце свое заключивый. Радуйся, и тело свое тою просветивый; радуйся, оное и по смерти нетленно сохранивый. Радуйся, преподобне княже Данииле, Московский чудотворче.
Кондак 3
Сила Вышняго укрепляше тя, блаженне, егда в кротости и в смирении души твоея возрастая, уготовлял еси себе на служение княжеское и о помощи небесней молился еси, взывая Богу: Аллилуиа.
Икос 3
Имея присно в души твоей глагол Господень, пророку реченный: “На кого воззрю, токмо на кроткаго и смиреннаго, и трепещущаго словес Моих”, потщался еси, святе, оными добродетельми себя украсити. Того ради ублажаем тя сице: Радуйся, подвижниче доблий, на высоту добродетелей возшедый; радуйся, нищетою духовною Царствие Небесное стяжавый. Радуйся, кротости ради землю обетования наследивый; радуйся, правды и истины паче всего искавый. Радуйся, чистотою сердца твоего Господа созерцавый; радуйся, миротворец нарочит в житии своем явивыйся. Радуйся, изгнания правды ради смиренно претерпевый; радуйся, мзду вечную добродетельми стяжавый. Радуйся, чистоты душевныя и телесныя сокровище; радуйся, любве и кротости Христовы вместилище. Радуйся, преподобне княже Данииле, Московский чудотворче.
Кондак 4
Бурею агарянскаго нашествия людие российстии потрясаеми, на тя, всечестне, яко на избранника Божия, взираху и, под кров твой державный прибегающе, защищение и утешение приимаху, вкупе с тобою взывающе Богу: Аллилуиа.
Икос 4
Видяще, святе, братия твоя отрока тя еще мала суща, наследия отча лишити тя умыслиша и удел малейший, Московский, точию вдати ти изволиша; ты же, кроток сый и незлобив, ничтоже противовещал еси и за обидящих тя Господеви молился еси. Сего ради ублажаем тя сице: Радуйся, кротости Христовы подражателю; радуйся, предивный нестяжателю. Радуйся, удел твой малейший возвеличивый; радуйся, всего себе воле Божией предавый. Радуйся, от Него токмо Единаго помощи искавый; радуйся, богатство тленное презревый. Радуйся, сокровища духовная возлюбивый; радуйся, от юности в благодати у Бога и человек возраставый. Радуйся, яко и по скончании земнаго жития твоего тую же благодать сугубо восприявый; радуйся, яко и мы благодати Божия по молитвам твоим сподобляемся. Радуйся, преподобне княже Данииле, Московский чудотворче.
Кондак 5
Боготечней звезде подобяся, на земли течение твое светло совершил еси, благоверный княже Данииле, лучи святости и потоцы милости всем изливая; ихже ради и в сонме святых пребываеши, поя с ними: Аллилуиа.
Икос 5
Слышавше ближнии и дальнии, яко в малем еще граде Москве на высоте стола княжескаго возоблистал еси, преславне княже Данииле, под сень крилу твоею притекаху, похвалы таковыя ти приносяще: Радуйся, княже благосердый, любовию своею вся покрываяй: радуйся, владыко прелюбивый, бедствующыя защищаяй. Радуйся, мудрость отца твоего, князя Александра, восприявый; радуйся, страны Московския утверждение. Радуйся, державы Российския украшение; радуйся, Церкве Христовы похвало высокая. Радуйся, людей российских упование благонадежное; радуйся, тобою бо во едино братство совокупляемся. Радуйся, яко твоим научением от распрей свобождаемся; радуйся, заповедей Божиих верный исполнителю. Радуйся, преподобне княже Данииле, Московский чудотворче.
Кондак 6
Проповедник Царствия Божия явился еси, благоверный княже Данииле: над людьми бо своими царствуя, слезу всяку от лица страждущих отымал еси, подвизая звати всех: Аллилуиа.
Икос 6
Возсиял еси, яко пресветлое солнце, на престоле Московстем, благоверный княже Данииле, величием души твоея и добродетельми всю землю Российскую озаряя и подвизая всех ублажати тя сице: Радуйся, мужу желаний духовных; радуйся, стяжателю даров небесных. Радуйся, милосердия сокровище неисчерпаемое; радуйся, кротости наставниче. Радуйся, заповедей евангельских делателю неленостный; радуйся, нищету вольную Христа ради возлюбивый. Радуйся, сиротам и вдовицам отче благосердный; радуйся, людем твоим помощниче богодарованный. Радуйся, в чине властителя кротость детскую проявивый; радуйся, душу твою в храм Божий добре претворивый. Радуйся, преподобне княже Данииле, Московский чудотворче.
Кондак 7
Хотяй Всевидец Господь прославити тя, блаженне, постави тя владыку преславна во смирении людем Своим, иже и взирающе на тя, и добродетелей твоих богатству чудящеся, пояху Ему: Аллилуиа.
Икос 7
Новаго и дивнаго устроителя земли Российския вемы тя, княже Данииле, кротостию бо, смиренномудрием, братолюбием и мудростию небесною княжение Московское возвеличил еси и сильно сотворил еси е. Сего ради приими от нас сицевая: Радуйся, мудрость Соломонову стяжавый; радуйся, кротость Давидову восприявый и тою враги твоя победивый. Радуйся, многия други себе стяжавый; радуйся, стольный град твой храмы Божиими украсивый. Радуйся, величию Москвы тем послуживый; радуйся, воине Христов неодоленный. Радуйся, от бед и скорбей всем скорое прибежище; радуйся, от всех зол твердое защищение. Радуйся, унывающим доброе вразумление; радуйся, всем братолюбцем присное ободрение. Радуйся, преподобне княже Данииле, Московский чудотворче.
Кондак 8
Странника и пришельца себе на земли быти помышляя, час кончины твоея пред очима твоима присно имел еси и сего ради обитель иноком во славу тезоименитаго ти преподобнаго Даниила возградил еси, идеже молитвы твоя Господеви возсылал еси, поя Ему: Аллилуиа.
Икос 8
Всего себе от юности Господу возложив, вся дни живота твоего, благоверный княже, Тому усердно работал еси и, ко блаженному успению достиг, в мире глубоце дух свой Ему предал еси. Людие же княжения твоего, окрест гроба твоего собравшееся, пояху ти сицевая: Радуйся, княже наш превожделенный, ко Господу отошедый; радуйся, нетленное тело твое нам оставивый. Радуйся, ароматы добродетелей твоих нам благоухаяй; радуйся, сиянием небеснаго света озаренный. Радуйся, обилием любве твоея вся удививый: радуйся, и врагом твоим благое упокоение у себе устроявый. Радуйся, крепость державы твоея тем созидавый; радуйся, наследником твоим присное научение. Радуйся, гроб твой, аки краеугольный камень, граду Москве положивый; радуйся, яко молитва твоя о людех и по смерти не оскудевает. Радуйся, преподобне княже Данииле, Московский чудотворче.
Кондак 9
Вси небеснии чини и святых собори радостно тя прияша, богомудре, подвиг земнаго течения своего добре совершивша и к вечному животу пресельшася, идеже с ними поеши: Аллилуиа.
Икос 9
Витий человеческих уста не возмогут изрещи пречуднаго прославления памяти твоея, угодниче Божий, егда бо гроба твоего место забвению предадеся, сам яве предстал еси юноше благочестивому, господина месту тому себе нарицая, и князя Иоанна обличая, и глаголя: “Чесо ради предал мя еси забвению? аще же и забвен аз тобою, не забы мя Господь”. Мы же, явление Твое благоговейно почитающе, сице вопием: Радуйся, града нашего Москвы Богом данный покровителю; радуйся, обители твоея неусыпный хранителю. Радуйся, яко и по успении твоем нас не оставляеши; радуйся, яко милосердие Божие о гресех наших умоляеши. Радуйся, мзду трудов твоих восприявый; радуйся, небесною славою душу твою осиявый. Радуйся, наследников твоих добрый учителю; радуйся, к добродетели твердый тем наставниче. Радуйся, всем людем благий пред Богом предстателю; радуйся, молитвы их к Престолу Его возносяй. Радуйся, преподобне княже Данииле, Московский чудотворче.
Кондак 10
Спасти всем хотяй Господь вельможу некоего, гроб твой, святе, поправша, недугом порази, обаче согрешение свое познавша и прощение от тебе приемша помилова, да и мы вси, достойно почитающе тя, благодарно вопием: Аллилуиа.
Икос 10
Стену необоримую и забрало крепкое граду Москве и всей державе Российстей Господь дарова тя, блаженне, верным в скорбех и нуждах пребыстрое заступление, да зовем ти сице: Радуйся, призывающим тя во благое скорый помощниче; радуйся, чистоты душевныя и телесныя сокровище. Радуйся, душевных и телесных недугов целителю; радуйся, державы нашея утверждение. Радуйся, Церкве Российския украшение; радуйся, яко отец чадолюбивый, чада твоя назираяй. Радуйся яко воевода непобедимый пределы земли нашея ограждаяй; радуйся, небрегущия о святыне страхом вразумляяй. Радуйся, яко кающимся скорое прощение испрошаеши; радуйся, яко благим подвигом тех научаеши. Радуйся, преподобне княже Данииле, Московский чудотворче.
Кондак 11
Пение всеумиленное приими от нас, прехвальне, и молитвы, приносимыя тебе, не презри: к тебе бо в скорбех прибегаем и пред гробом твоим слезы проливаем, зовуще: Аллилуиа.
Икос 11
Светозарна светильника благодати яви тебе всех Творец, силою бо, данною ти свыше, юношу при гробе твоем от одра смерти возставил еси. Сего ради ублажаем тя сице: Радуйся, милостивый скорбящим помощниче; радуйся, сосуде, Святаго Духа исполненный. Радуйся, дарами Того обогащенный: радуйся, сими дарами и молящихся тебе обогащаяй. Радуйся, ко Святей Троице дерзновение велие стяжавый; радуйся, дерзновение сие на помощь людем направляяй. Радуйся, силу чудес от Бога приявый; радуйся, за грешныя Господа умоляяй. Радуйся, любве и кротости Христовы вместилище; радуйся, безпомощных скорый помощниче. Радуйся, преподобне княже Данииле, Московский чудотворче.
Кондак 12
Благодатию, данною ти свыше, недуги исцеляеши, враги и супостаты от нас отгоняеши, жизнь нашу умиряеши и душам нашим полезная подаеши, да благодарственно взываем Богу: Аллилуиа.
Икос 12
Поем честныя подвиги твоя, ублажаем чистое житие твое, восхваляем священную память твою, Данииле благоверне, и, прославляюще Господа всех, вопием ти сице: Радуйся, яко крест богоугоднаго жития до конца понесл еси; радуйся, яко о скорбех твоих Бога благодарил еси. Радуйся, всяку добродетель в себе изобразивый; радуйся, иго Христово возлюбивый. Радуйся, немощи немощных на себе носивый; радуйся, благоволение Божие людем твоим испросивый. Радуйся, присно на Небеси торжествуяй; радуйся, на земли преславно чудодействуяй. Радуйся, людем твоим помощниче богодарованный; радуйся, Ангелом собеседниче достойный. Радуйся, преподобне княже Данииле, Московский чудотворче.
Кондак 13
О преславный угодниче Христов и чудотворче, преподобне княже Данииле, отрадо и утешение всех с верою к тебе прибегающих! Приими от нас, недостойных, сие малое моление, с любовию тебе приносимое, и теплым ходатайством твоим ко Господу огради святую обитель твою, умири жизнь нашу и даруй нам покаяние совершенное, избави нас от бед и вечныя муки, да купно с тобою благодарственно вопием: Аллилуиа.
(Этот кондак читается трижды, затем икос 1 и кондак 1)

Молитва | Акафист | Канон | Житие | Иконы


Молитвы святых. Святые угодники. Иконы.

Иные православные молитвы, святые угодники, чудотворные иконы:


... Запомнить сайт ... Ctrl+D

Молитва мученику младенцу Гавриилу Белостокскому
Mолитва новомученикам и исповедникам Российским
Икона Божией Матери Знамние
Псалтырь Кафисма 18 Псалом 119-133
Святитель Иона Московский митрополит Московский и всея Руси
Акафист святой мученице Параскеве
Александр Свирский Акафист святому преподобному чудотворцу
Икона Святой праведный Иоанн Кронштадтский
Преподобный Роман Сладкопевец
Житие и страдание святой великомученицы Варвары
Икона Священномученик Харлампий и Власий
Акафист преподобному Онуфрию Великому пустынножителю царевичу Перскому
Акафист святой великомученице Евфимии Всехвальной
Икона Преподобный Марон Пустынник
Артемий Веркольский Житие святого праведного чудотворца
Святой великомученик Георгий Победоносец
Преподобномученик Афанасий Игумен Брестский

Читать далее в Православном разделе:


Церковные праздники в Мае. Православный церковный календарь Мая.
Церковные праздники в Июне. Православный церковный календарь Июня.
Церковный праздник 5 декабря Апостолы Архипп и Филимон, Благоверный князь Михаил Тверской, Мученик Менигн, Праведный Михаил.
Церковный праздник 7 февраля Святитель Григорий Богослов, Икона Божией Матери именуемая Утоли моя печали.
Церковный праздник 10 июня Никита исповедник Халкидонский епископ, Святой Игнатий.
Церковный праздник 11 июня Блаженный Иоанн Христа ради юродивый, Преподобномученицы Феодосии девы Цареградской, День святых отцов Первого Вселенского Собора.
Церковный праздник 17 июля Император Николай Александрович, Благоверный князь Андрей Боголюбский, Святитель Андрей епископ Критский, Преподобная Марфа, Святой Андрей Рублев.
Церковный праздник 29 июля Священномученика Афиногена епископа Пидахфои, Мученица дева Иулия, Икона Божией Матери Чирская Псковская.
Церковный праздник 10 сентября Преподобного Иова Почаевского, Моисей Мурин, Преподобный Савва Крыпецкий.
Церковный праздник 13 ноября Апостолы Стахий Амплий Урван Наркисс Апеллий и Аристовул, Мученика Епимаха, Преподобный Никодим Кожеезерский.
Церковный праздник 29 ноября Апостол и евангелист Матфей, Праведный Фульвиан.

Весь Православный раздел ...

Уральские горы, города Урала, достопримечательности Урала.




^Наверх