Главная --> Святые Угодники Божьи --> Акафист Евфимии Всехвальной

Акафист святой великомученице Евфимии Всехвальной

Молитва | Акафист | Житие | Иконы

Акафист святой великомученице Евфимии Всехвальной

Кондак 1
Избранней и венчанней деве мученице, истинней поклоннице живущаго на небесах истиннаго Бога, невесте Христовой Евфимии, от сердец умиленных похвальное пение воспоим. Ты же, яко всехвальная победительница и низложительница врага лукаваго, от всяких нас бед защити, Господа о нас присно умоляя, да зовем ти: Радуйся, святая великомученице Евфимие, невесто Христова всехвальная.

Икос 1
Ангелом чистотою души своея уподобилася еси, святая дево Евфимие, с ними же ныне в светлости неизреченней ликуеши и от трудов своих почиваеши. Темже, не забуди и нас, живущих на земли, да и мы сподобимся причастницами славы Божия явитися, поющии ти:
Радуйся, от родителей благочестивых рожденная. Радуйся, благочестию ними наученная. Радуйся, красотою своею ангелам уподобившаяся. Радуйся, благородным происхождением своим не возгордившаяся. Радуйся, яко в послушании Господу своему славно пожила еси. Радуйся, яко Его всем сердцем своим пламенно возлюбила еси. Радуйся, святая великомученице Евфимие, невесто Христова всехвальная.

Кондак 2
Видяще нечестивый Диоклетиан, яко христиане гнушахуся жертвы идолом богомерзким воздавати, повеле предавати их на мучения лютыя. Ты же, всехвальная Евфимие, в тайнем месте с сорока христианы служение Господу нашему Иисусу Христу совершала еси, чистым сердцем Его славя: Аллилуиа.

Икос 2
Силу веры своея показуя, купно с присными твоими, боголюбивая Евфимие, влекомая, яко овца на заклание, небоязненно пред мучителем своим стала еси, даже до крови пострадати за Господа своего готовившаяся. Темже, таковую крепость твою видя, восхваляем тя пении сими:
Радуйся, яко повелению цареву не покорилася еси. Радуйся, яко твари вместо Творца не поклонилася еси. Радуйся, поклонницею истиннаго Бога себя показавшая. Радуйся, идолом мерзким жертву не воздавшая. Радуйся, льстивой речью царя не прельстившаяся. Радуйся, от пути прямого, в рай ведущий, не уклонившаяся. Радуйся, святая великомученице Евфимие, невесто Христова всехвальная.

Кондак 3
Верою своею в мучениях непоколебима бе, блаженная Евфимия, купно с тобою бо страдавшия, тако укрепляху тя, юную и прекрасную: Подвизайся, дево, Жениха Небеснаго ради, подвизайся страданием Ему угодити, подвизайся во сретение Его изыти с мудрыми девами, да возлюбит Он тя, яко невесту Свою и введет тя в чертог Свой, в нем же воспоеши Ему сладце: Аллилуиа.

Икос 3
Видя нечестивый проконсул тя, достоблаженная Евфимие, в лике святых мучеников, яко луну посреди звезд сиявшую, аки волк хощный похити тя из Христова стада. Мы же, словесам твоим радуяся: "Не остави мене, вселюбезнейший Женише мой, на Тя токмо надеющуюся, не выдай зверям душу, любящую Тя и исповедающую имя Твое святое, не дай врагу моему возрадоватися надо мною, укрепи мя, немощную рабу Твою, да не одолеет мя беззаконие", воспеваем ти:
Радуйся, к Богу за помощию взывавшая. Радуйся, в руце Его спасение свое отдавшая. Радуйся, яко на Господа упование свое возложила еси. Радуйся, яко в отчаяние не впадала еси. Радуйся, благодатию Господа укрепившаяся. Радуйся, пред мучителем не посрамившаяся. Радуйся, святая великомученице Евфимие, невесто Христова всехвальная.

Кондак 4
Восхотев к безбожию своему обратити тя, святая Евфимие, мучитель лестию тя уловити потщися, абие с твердостию отвещавала еси ему: На Христа моего токмо уповаю, яко не оставит мя и не отнимет руки Своея от мене и Ему Единому душой взываю: Аллилуиа.

Икос 4
Хотяй волю твою сломити и к идолом мерзким приклонити, повеле нечестивый мучитель твой на мучения тяжкия тя отдати, непреклонная в исповедании своем Евфимие. Егда же служителие привязаху тя к колесу со множеством ножей, ты крестным знамением осенивши ся, ко Господу с усердием молилася еси: "Господи, просвещение души моея, прииди ныне на помощь ми, да уразумеют вси, яко Ты еси Единый Бог!" Таковое исповедание твое зряще, умиленными сердцами вопием ти:
Радуйся, яко пыток мучителя не убоялася еси. Радуйся, яко Господу со тщанием молилася еси. Радуйся, крестом святым себя осенявшая. Радуйся, сим знамением враги своя побеждавшая. Радуйся, яко Вышняго положила еси прибежище себе. Радуйся, яко зло и рана не приближися тебе. Радуйся, святая великомученице Евфимие, невесто Христова всехвальная.

Кондак 5
Боготечней звезде уподобилася еси, всехвальная Евфимие, егда ангельский свет освети тя и ангел Божий сокруши колесо и снем тя, раны исцели твоя. С ним же радостно воспела еси Богу, Его силу прославляя: Аллилуиа.

Икос 5
Видевши сие чудо мучитель и вси бывшие тамо, в недоумение преидоша и много чуду сему дивляхуся, обаче не возмогоша познати крепкую руку истиннаго Бога: видяще бо не видеша и слышаще не уразумеша, окамене бо сердце их. Мы же, силу Божию на тебе зряще, Богом возлюбленная Евфимие, с радостию воспеваем ти:
Радуйся, силою Божиею чудеса творившая. Радуйся, неверующих исцелением своим удивившая. Радуйся, ангелом незримо охраняемая. Радуйся, крепкой мышцею Господней укрепляемая. Радуйся, яко во славу Христа подвизалася еси. Радуйся, яко исповеданием своим Господа прославляла еси. Радуйся, святая великомученице Евфимие, невесто Христова всехвальная.

Кондак 6
Проповедницею славы Божией явилася еси, богомудрая Евфимие, к пещи бо огненной приведенная, огня вещественнаго не убоялася еси, огнем любви ко Богу пламенея. На небо очи возведя, молитву Господу творила: Аллилуиа.

Икос 6
Возсия свет чудный воином Виктору и Сосфену, во огни бо дивное видение узреша: пред ними ангели Божии предсташа, огнь разметая и воспящая невесты Христовой касатися. Увидев чудо сие, мучителю глаголаша: "Не посмеем мы коснутися к сей святей деве и ввергнути ю в огнь, аще бо и повелиши главы нам усекнути, ибо зрим мы чудо велие, еже ты не зриши. И уне терпети нам ярость твою, нежели гнев светоносных мужей, в пламени огненнем стоящих". Купно с благоразумными воинами, воспеваем ти, мужественная Евфимие:
Радуйся, яко пламени огненнаго не убоялася еси. Радуйся, яко паки ангельским заступлением сохранилася еси. Радуйся, яко к свету истинному Виктора и Сосфена привела еси. Радуйся, яко им в Бога уверовати помогла еси. Радуйся, силою молитвы своея огнь в пещи угасившая. Радуйся, паки чудо новое пред всеми сотворившая. Радуйся, святая великомученице Евфимие, невесто Христова всехвальная.

Кондак 7
Хотящу тя погубити, повеле нечестивый мучитель твой, доблестная Евфимие, иным воином Кесарю и Варию паки тя в пещь ввергнути. Пламя сильное попали сих неразумных воинов, ты же, ликуя посреди пещи, яко в чертозе светлем, песнь триех отроков воспевала еси, славя Бога: Аллилуиа.

Икос 7
Новое чудо людем неверующим показа Господь, огнь бо не коснуся святой Евфимии, ибо Сам Жених нетленный Иисус Христос тайно прииде в пещь к невесте Своей и ороси ю небесною прохладою. Мы же, изумляяся чудеси сему, поем ти умиленно:
Радуйся, от пламени огненнаго Господом сохраненная. Радуйся, росою небесною Ним орошенная. Радуйся, целою и здравою из пещи изшедшая. Радуйся, в изумление дивное всех приведшая. Радуйся, яко паки мучителя посрамила еси. Радуйся, яко веру на поругание тому не дала еси. Радуйся, святая великомученице Евфимие, невесто Христова всехвальная.

Кондак 8
Странно есть видети нечестивому проконсулу чудеса, на тебе творящиеся силою Божиею, преславная Евфимие, не ведая более чесо сотворити с тобою, повеле в темницу тя всадити. Послежде воинов Виктора и Сосфена к себе призвавши, повеле им идолом мерзким поклонитися. Они же, Господу поклонишася, славя имя Его святое: Аллилуиа.

Икос 8
Всех Господь и Создатель просвети светом истины Виктора и Сосфена, шедшим бо им на казнь и усердно Богу молившимся, раздася с небеси глас Божественный, ко упокоению их призывающий. С радостию души свои Богу предавши, ныне на небеси купно с тобою, святая Евфимие, воспевают Бога, с ними же приими и наша похвалы сия:
Радуйся, яко души многих исповеданием своим к Богу привела еси. Радуйся, яко с ними ныне ликуеши на небеси. Радуйся, чистотою своею присно сияющая. Радуйся, звездою яркою нам блистающая. Радуйся, в Царство Божие нас путеводящая. Радуйся, всем нам спастися хотящая. Радуйся, святая великомученице Евфимие, невесто Христова всехвальная.

Кондак 9
Всею душею своею Бога славила еси, достоблаженная Евфимие, егда ведену ти бывшу на судище, воспевала еси Ему: "Боже, песнь нову воспою Тебе. И буду славити Тя посреди племен и языков, Ты бо еси Единый истинный Бог и несть инаго Бога, паче Тебе!". С тобою и мы воздаем хвалу истинному Богу нашему: Аллилуиа.

Икос 9
Ветийство человеческое не довлеет по достоянию восхвалити вся претерпенная тобою мучения и страдания во славу Бога истиннаго: не можаху бо нечестивый мучитель твой принудити тя жертвы идолом воздати, повеле повесити тя и тело твое острыми ножами строгати. Ты же, силою Божиею, и послежди сего мучения невредимою осталася еси. Мужество и долготерпение твое прославляя, дражайшая Евфимие, вопием ти умиленными гласы:
Радуйся, кровию себя от главы до ног обагрившая. Радуйся, кровию истекшею душу свою убелившая. Радуйся, повешение со Христом претерпевшая. Радуйся, в страданиях лютых Бога воспевшая. Радуйся, яко воспевая Бога, укрепилася еси. Радуйся, яко в мучениях с Господом сочеталася еси. Радуйся, святая великомученице Евфимие, невесто Христова всехвальная.

Кондак 10
Спасти хотящи душу твою, тело свое не жалела еси, прехвальная Евфимие, и в ров изрытый, гадами и ехиднами исполненный, небоязненно вошла еси, крестным знамением себя осеняя и ко Господу моляся: Свете мой Иисусе Христе! Ты во утробе воднаго зверя невредимым Иону сохранил еси, Ты избавил еси Даниила от уст львовых, сохрани и мя крепкою рукою Твоею, да прославится во мне имя святое Твое, да воспою Тебе песнь славы: Аллилуиа.

Икос 10
Стеною твердою и неодолимою бысть тебе Господь, на Него же упование свое возлагала еси, славная дево Евфимие, яко изо рва воднаго, по милости Божией, невредима от гадов и змий вышла еси, мучителя жестокость и неверие посрамляя. Того ради приими хваления наша, с любовию тебе приносимыя:
Радуйся, в ров безбоязненно вшедшая. Радуйся, погибели в нем не нашедшая. Радуйся, в вере своей мучителем неодолимая. Радуйся, Божьей десницею верно хранимая. Радуйся, яко и твари водныя тебе не вредиша. Радуйся, яко и ангели тебе служаху и от смерти храниша. Радуйся, святая великомученице Евфимие, невесто Христова всехвальная.

Кондак 11
Пение похвальное приносим тебе, богорадованная Евфимие, немогущии разумом своим постигнути, яко ты столь млада сущи такия велия страдания претерпевала еси: ты бо по острым мечам и копиям, хврастием и землею прикровенным, яко птица, легце прешла еси, Господа преславно восхваляя: Аллилуиа.

Икос 11
Свещею, немерцаемо горящею и мрак идольский разгоняющею, явилася еси, богомудрая Евфимие, слышаще бо людие неверующии, яко ты неустанно восхваляеши Господа: "Кто возглаголет силы Господни, слышаны сотворит вся хвалы Его", в вере истинней просвещахуся, с ними же приими и наша похвалы тебе:
Радуйся, Господа верно и неустанно прославлявшая. Радуйся, на Его Единаго искренне уповавшая. Радуйся, яко проконсула терпением своим посрамила еси. Радуйся, яко в сети, ним расставленныя, не уловилася еси. Радуйся, преодолением страданий своих мучителя утомившая. Радуйся, от истиннаго Бога ни на шаг не отступившая. Радуйся, святая великомученице Евфимие, невесто Христова всехвальная.

Кондак 12
Благодатию, данною ти от Бога, новыя страдания претерпела еси, доблестная Евфимие, яже на тя мучитель твой воздвиже: перепилити бо тя намереваяся, не возможе вреда тебе причинити, на раскаленных углиях сожигати тя повеле, абие углие ангелы, с тобою неотступно пребывающии, остудиша. Ты же, вся мучения мужественно преодолевая, Подателю сил и крепости Господу Иисусу воспевала неустанно: Аллилуиа.

Икос 12
Поюще крепкия подвиги твоя, хвалим терпение и смирение твое, боговенчанная Евфимие, ними бо врага невидимаго посрамила еси и венец нетленный от Господа на небеси стяжала еси. Темже на последнее мучение твое ведомая, осуди бо тя мучитель твоей на съедение зверем, молилася еси ко Господу: "Господи сил! Ты явил еси на мне Твою непобедимую силу и неодоленную десницу, Ты показал еси немощь бесов и безумие мучителя, а мене поставил еси высше всех мучений. Приими ныне мою жертву, принесенную Тебе от души сокрушенной и смиреннаго духа, и упокой душу мою в селениях святых и в лике мучеников, яко благословен еси во веки". Просвети и нас, всехвальным исповеданием твоим, да зовем ти умиленно:
Радуйся, яко лютыя звери ноги тебе лизаху. Радуйся, яко причинити вреда зверие тебе не можаху. Радуйся, глас с небеси, во обители горния тя призывавший, услыхавшая. Радуйся, с радостию душу свою Господу отдавшая. Радуйся, яко с почестями родителями твоими погребена была еси. Радуйся, яко чрез пролитие крове своея невестою Жениха Небеснаго стала еси. Радуйся, святая великомученице Евфимие, невесто Христова всехвальная.

Кондак 13
О святая великомученице Евфимие, Господа неустанно в мучениях своих восхвалявшая и от благодарных чад Божиих всехвальною нареченная. Научи же и ны все упование наше на Единаго Господа возлагати и Ним Единым в бедах и скорбех наших укреплятися, да возможем причастницами Царствия Его стати, в нем же с тобою воспевати Ему будем: Аллилуиа. Аллилуиа. Аллилуиа.

Молитва | Акафист | Житие | Иконы


Молитвы святых. Святые угодники. Иконы.

Иные православные молитвы, святые угодники, чудотворные иконы:


... Запомнить сайт ... Ctrl+D

Чудотворные Праздники иконы Божьей матери и молитвы к Пресвятой Богородице
Чудотворные иконы на каждый день
Молитва святому преподобному Паисию Величковскому
Икона Божией Матери Отрада или Утешение
Икона Божией Матери "Державная"
Икона Божией Матери Боголюбская
Псалтырь Псалом
Мученица Людмила княгиня чешская
Мученик архидиакон Лаврентий
Акафист преподобному Серафиму Саровскому чудотворцу
Преподобный Серафим Саровский чудотворец
Архангел Михаил
Акафист святым безсребренником и чудотворцем Косме и Дамиану Ассийским
Преподобный Галактион Вологодский чудотворец
Житие преподобного Иова игумена и чудотворца Почаевского
Житие священномученика Власия, епископа Севастийского
Албазинская икона Божьей Матери Слово плоть бысть

Читать далее в Православном разделе:


Церковный праздник 22 декабря Зачатие праведной Анною Пресвятой Богородицы, Икона Божией Матери Нечаянная Радость, Святитель Софроний архиепископ Кипрский.
Церковный праздник 6 марта Преподобный Тимофей, Козельщанская икона Божией Матери, Святой Евстафий.
Церковный праздник 10 марта Святитель Тарасий Патриарх Константинопольский.
Церковный праздник 18 марта Мученик Конон Исаврийский, Обретение мощей благоверных князей Феодора Смоленского и чад его Давида и Константина Ярославских чудотворцев.
Церковный праздник 23 марта Мученик Кодрат Никомидийский, Мученика Кодрата.
Церковный праздник 10 мая Апостол и священномученик Симеон Преподобный, Стефан Печерский.
Церковный праздник 15 июня Святителя Никифора исповедника патриарха Константинопольского, Великомученик Иоанн Новый Сочавский, Княжна Иулиания.
Церковный праздник 19 июня Преподобного Виссариона чудотворца Египетского, преподобного Илариона Нового, Пименовская икона Пресвятой Богородицы.
Церковный праздник 2 сентября Пророка Божия Самуила, Мученик Севир.
Церковный праздник 30 октября Пророка Божия Осии, Преподобномученик Андрей Критский, Святые мученики бессребреники Косма и Дамиан, Преподобный Антоний Леохнрвский.
Церковный праздник 5 ноября Апостол Иоаков, Преподобный Иаков Боровицкий, Святитель Игнатий.

Весь Православный раздел ...

Уральские горы, города Урала, достопримечательности Урала.




^Наверх